გონიო-კვარიათის ადმინისტრაციული ერთეულის მოსახლეობას დღეს საკრებულოს თავმჯდომარე სულიკო თებიძე, მაჟორიტარი დეპუტატი მიხეილ ართმელაძე, ქალაქის მერი ლაშა კომახიძე და ვიცე-მერი თენგიზ პეტრიძე, მერიის შესაბამისი სამსახურების ხელმძღვანელებთან ერთად შეხვდნენ.

გონიო-კვარიათის ადმინისტრაციული ერთეული ქალაქის ერთ-ერთ ტურისტულ ზონას წარმოადგენს და შესაბამისად, მოსახლეობის მოთხოვნაც, ძირითადად, ისეთი ინფრასტრუქტურული პრობლემების მოგვარებას ეხებოდა როგორიცაა: საავტომობილო გზების მოასფალტება, საკანალიზაციო და სანიაღვრე სისტემების მოწესრიგება, ასევე, ფერდსამაგრი სამუშაოებისა და მიწის აღიარებასთან დაკავშირებული საკითხების გადაწყვეტა.
შეხვედრაზე მუნიციპალიტეტის პირველმა პირებმა აღნიშნეს, რომ მოსახლეობის მიერ დასმული პრობლემების გარკვეული ნაწილი გონივრულ ვადაში მოგვარდება, ნაწილის გადაწყვეტას კი მუნიციპალიტეტის შესაბამისი სამსახურები კონკრეტული პროგრამებითა და პროექტებით ეტაპობრივად უზრუნველყოფენ.